ଜାନକୀଙ୍କ ଗଡ଼ ସଜାଡୁଛନ୍ତି ପୃଥ୍ବୀବଲ୍ଲଭ

ଖୋର୍ଦ୍ଧା: କଂଗ୍ରେସ ଗଡ଼ ବେଗୁନିଆ ଉପରେ ନିବଦ୍ଧ ରହିଛି। ଦଳ ଏଠାରେ ସବୁବେଳେ ବଡ଼ ଲଢ଼େଇ ଦେଇଆସିଛି। ଏଣୁ ଏହି ଆସନ ଏବେ କଂଗ୍ରେସ ପାଇଁ ସମ୍ମାନର ପ୍ରଶ୍ନ ଭାବେ ଛି଼ଡ଼ା ହୋଇଛି। ବିଶେଷକରି ଏଠାରେ ବିଜେଡି-ବିଜେପି ପ୍ରାର୍ଥିତ୍ବକୁ ନେଇ ଛକାପଞ୍ଝା ଜାରି ରହିଥିବା ବେଳେ ଗୁରୁତ୍ବପୂର୍ଣ୍ଣ ଏହି ଆସନରୁ କଂଗ୍ରେସ କାହାକୁ ପ୍ରାର୍ଥୀ କରିବ, ତାହାକୁ ବେଶ୍‌ ଗୁରୁତ୍ବ ଦିଆଯାଉଛି।ବେଗୁନିଆକୁ କଂଗ୍ରେସର ସଶକ୍ତ ଦୁର୍ଗ କରାଇବାର ନାୟକ ହେଉଛନ୍ତି ଓଡ଼ିଶାର ପୂର୍ବତନ ମୁଖ୍ୟମନ୍ତ୍ରୀ ସ୍ବର୍ଗତ ଜାନକୀ ବଲ୍ଲଭ ପଟ୍ଟନାୟକ। ଏ ବିଧାନସଭା କ୍ଷେତ୍ର କଂଗ୍ରେସର ଦୁର୍ଗ ଅପେକ୍ଷା ଜାନକୀ ବାବୁଙ୍କ ଗଡ଼ ଭାବେ ବେଶ୍ ପରିଚିତ। ଆଜକୁ ପ୍ରାୟ ୨୯ବର୍ଷ ତଳେ ଜାନକୀ ବାବୁ ୧୯୯୫ ମସିହାରେ ପ୍ରଥମେ ବେଗୁନିଆରେ ନିଜର ରାଜନୈତିକ ପାଦ ଥାପିଥିଲେ। ବେଗୁନିଆ ଉପନିର୍ବାଚନରେ କଂଗ୍ରେସ ପ୍ରାର୍ଥୀ ହୋଇ ସେ ୭୦ହଜାର ୨୨୩ଖଣ୍ଡ ଭୋଟ୍‌ ପାଇଥିଲେ। ସେବେ ପ୍ରତିଦ୍ବନ୍ଦ୍ବୀ ଜନତା ଦଳର ପ୍ରାର୍ଥୀ ପ୍ରସନ୍ନ ପାଟ୍ଟସାଣୀଙ୍କୁ ୨୨ହଜାର ୯୮୭ଖଣ୍ଡ ଭୋଟ୍‌ରେ ପରାସ୍ତ କରିଥିଲେ। ସେଦିନଠୁ ରାଜ୍ୟ ରାଜନୀତିରେ ବେଗୁନିଆ ବିଧାନସଭା କ୍ଷେତ୍ରର କଂଗ୍ରେସର ଦବ୍‌ଦବା ରହିଆସିଛି। ଜାନକୀ ବାବୁ ବେଗୁନିଆରୁ ୨୦୦୪ମସିହାରେ ଦ୍ବିତୀୟ ଥର ପାଇଁ ବିଧାୟକ ଭାବେ ନିର୍ବାଚିତ ହୋଇଥିଲେ ଏବଂ ସେଥର ସେ ବିଧାନସଭାରେ ବିରୋଧୀ ଦଳର ନେତା ରହିଥିଲେ। ରାଜ୍ୟର ଜଣେ ପୂର୍ବତନ ମୁଖ୍ୟମନ୍ତ୍ରୀ ଏବଂ ବିରୋଧୀ ଦଳର ନେତାଙ୍କୁ ନେତୃତ୍ବ ଦେଇଥିବା ଦୃଷ୍ଟିରୁ ବେଗୁନିଆ ବିଧାନସଭା ନିର୍ବାଚନମଣ୍ଡଳୀ ବେଶ୍ ଗୁରୁତ୍ବପୂର୍ଣ୍ଣ।